فى النهاية، كله بيعمل العادي، كله بيعمل الروتين، مفيش تجديد أو تغيير..

مفيش تغيير إلا أما انت تعمل التغير..

كله عادي حتى انت تصنع الفرق

إن كان الأب هو القدوة والمثل الذى يحتذى به، مش بيعمل حاجة فى حياته، مفيش إنجازات، مفيش حاجة تخلد ذكراه، مفيش حاجة تخلي الناس تهتم تعرف أخباره أو تعرفه هو شخصيًا.. أطفاله هيطلعوا ايه؟

علماء ذرة مثلا؟ ما هيطلعوا زيه

وإن كانت الأم هي الأمل والنافذة اللى بنشوف بيها المستقبل، مش بتعمل حاجة فى حياتها، مفيش إنجازات أو حاجة تخلد ذكراها، مفيش حاجة تخلي الناس تهتم تعرف أخبارها أو تعرفها هي شخصيًا.. أطفالها هيطلعوا ايه؟

وإن كان الأخ أو الصاحب هو الخليل، هو ونيسك، مش بيعمل حاجة فى حياته، مفيش إنجازات، مفيش حاجة تخلد ذكراه، مفيش حاجة تخلي الناس تهتم تعرف أخباره أو تعرفه هو شخصيًا.. أصحابه اللى بيخدوا من طباعه عن طريق القرب، هيبقوا ايه؟

وإن كانت الأخت أو الصاحبة هى الخليلة، هي ونيستك، مش بتعمل حاجة فى حياتها، مفيش إنجازات أو حاجة تخلد ذكراها، مفيش حاجة تخلي الناس تهتم تعرف أخبارها أو تعرفها هى شخصيًا.. أصحابها اللى بياخدوا من طباعها عن طريق القرب هيبقوا ايه؟

هتروح لربنا تقوله ايه لما يسألك عن عمرك فيما أفنيته؟

روح يا ابنى الحق عمرك اللى بيتسرق منك واعمل ليك قيمة!

هو العمر فيه قد ايه عشان متعملش حاجة في حياتك؟

اعمل لنفسك إنجازات، تخلي أهلك فخورين بيك، تخليك نفسك فخور بنفسك، تخليك قدوة صح وأطفال يقلدوك.. تبقى أمل صح وتدي أطفالك أمل أنهم يبقوا زيك أو حتى أحسن.. تبقى خليل أو خليلة صح، وننقل لأصحابك طباع كويسة..

مش عايزاك تبقى سفير النوايا الحسنة ليفل ٨٣٨٢..

يعني أكيد هحب كده، لكن كمان عايزاك تنجح وتتفوق فى المجال اللى انت فيه حتى لو كان تربية رياضية قسم بلبطة..

تعمل لنفسك قيمة..

لما تبقى قاعد وتسأل نفسك "انا بعمل ايه في حياتي؟ او ايه يفرقني عن الاباجورة اللي في اوضتي؟" تعرف ترد..

لو مثلا فضلت أعيد وأزيد فى حكاية قدوتي وأملي وخليلي وخليلتي، حد هيهتم يقرأهم أو يسمعهم تاني؟ لا

عايزة الناس متزهقش لما تقرأ تاريخك.. عايزة الناس تقول "يارب أبقى زيه أو احسن منه."

اعمل لنفسك قيمة..

اسأل نفسك سؤال.. بتعمل ايه فى حياتك؟

ولا حاجة؟

ولا حاجة ليه؟

قدامك حياة كاملة.. رسم ورياضة وكتابة وتمثيل وغنا وجمعيات خيرية وشغل فى سن صغير وقدامك تفوق فى المجال اللى انت اتخصصت فيه وقراءة قرآن وتسبيح ومساعدة أهلك وزيارة قرايبك وخروجات للترفيه.. قدامك سفر وانك تتعلم لغات جديدة او لكنات جديدة، تاخد خبرات..

بس أهم حاجة النية.. النية انت بتعمل ده ليه؟ هتفنى عمرك فى ده ليه؟ هيساعدك فى حياتك؟ هيجيبلك ثواب؟ هيساعد حد؟ ولا منغير سبب؟

حد مرة قال "لا تكن ميت يتنفس!" ..

ايه هيفرقك عن الجماد فحالة معملتش لنفسك قيمة؟

اسمعوا أغانى تشجعكوا على النجاح زي Hall of fame بتاعة The Script

زى who says بتاعة Selena Gomez

اقرأوا قصص كل اللى نجحوا فى حياتهم..

اعرفوا ان كل حاجة عادية جدا.. حتى نغيرها.. حتى نصنع النغيير بإيدينا.

حتى نبوظ الحياة الروتينية ديه اللى مفهاش نبض أو حياة..

و اعرفوا ان "الحلم مجرد حلم لحد ما تقرر تخليه حقيقة" -هارى ستايلز

اشتغل على حلمك و ان شاء الله هتوصل، لكل مجتهد نصيب

مش عايزة أطول كتير؛ خير الكلام ما قل ودل..

روحوا اعملوا لنفسكو قيمة.

و افتكروا كلام دكتور مصطفى محمود الله يرحمه لما قال "الشرف مراتب.. فهناك رجل يصنع نفسه.. و هناك رجل يصنع أولاده.. و هناك رجل يصنع المجتمع.. و هناك رجل يصنع التاريخ.. و هو أشرف الشرفاء جميعًا.. و إذا أردت أن تعرف نصيبك من الشرف.. فاسأل نفسك يومًا : ماذا صنعت لأصبح أحسن من الأمس؟"

و لو مإقتنعتوش بكلام كل دول، ربنا سبحانه و تعالى قال (فَاسْتَبِقُوا الْخَيْرَاتِ)

{البقرة: 148}.

و كمان ربنا قال (وَسَارِعُوا إِلَى مَغْفِرَةٍ مِنْ رَبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ)

{آل عمران:133}.

سو ياه، ذاتس ات،
اشوفكوا فى قصة تانية❤

أشوف وشكو بخير❤