كنت قاعدة في مرة وسط جلسة  واتطرح سؤال ..
* ليه لما عرفتي أنك في علاقة مؤذية ممشتيش؟
والإجابات كلها بما فيهم إجابتي الحقيقة كانت كلها لوم على الذات ..
الحقيقة من أكثر الأشياء أسفا هو اللوم على الضحية لتعرضها الأذى .. يعني تلاقي واحدة تطلع تقول أنه فلان اتحرش بيها، فا تلاقي مثلا الاتهامات وليه سكتي ساعتها، وليه كنتي سايبة علاقتكوا بالشكل ده، ليه كنت لابسة كده ..
أو مثلا ست تحكي أن زوجها كان بيضربها، فا تلاقي الأسئلة وليه كنت بتسكتي، وليه كنتي بتعصبيه وغيره ..
اللوم من أشكال الإذى العاطفي الشديد اللي بتتعرضله الضحية داخل وأثناء خروجها وبعد خروجها من العلاقة المؤذية ..

أفتكر أني صديقة ليا في مرة قالتلي وأنا بحكيلها عن شئ مؤذي يخصني،
- وليه كنتي موافقة،
قولتلها بس أنا مكنتش موافقة ،
ردت قالتلي بس فضلتي موجودة ..
والحقيقة أن في جانب مهم جدا بيغفله الكثير من اللي مش عاشوا جوة علاقة مؤذية أو مرت عليهم خبرة مشابهة من قريب أو بعيد ..
أن من أهم صفات الضحية أنها بتكون مسلوبة الإرادة قرارها مش في ايدها، وعشان كده دايما العلاقة المؤذية بتقوم على مفهوم السلطة ..
أب وابنه
زوج وزوجته مثلا ..

أوقات الشخص المؤذي بيبحث عن غطاء ديني أو مجتمعي لسلطته وأحيانا بيستند لألاعيب كتيرة يقدر بيها يسحب حرية الضحية من بين ايديها وبشكل ذكي جدا ..
عشان كده هتلاقي اتنين صحاب مثلا واحد فيهم مؤذي والتاني ضحية .. هنا المؤذي معتمدش على وجود غطاء مجتمعي واضح، لكن استخدم قدرته على خلق نوع آخر من السلطة على الضحية ..

طيب ليه برده ... ليه الضحية مبتعرفش تخرج من علاقة مؤذية،
الحقيقة أن في أسباب كتير ..
بس أنا جمعت 8 من أكتر الحاجات الشائعة واللي أنا شخصيا مريت بيها ..

1. شكل المجتمع ..
وجود الضحية في مجتمع بيقبل الأذى تجاهها ..
مثال ..
ست بتتضرب .. وبتروح تقعد مع أصحابها تحكي أنها اتضربت فا تلاقي صديقة ليها هي كمان بتتضرب وقابلة وبتقولها أنه شئ عادي ومقبول ..
فا تبدأ تحس أنه السلوك المؤذي ده مقبول مجتمعيا وأنه محدش هيساعدها لو اتكلمت ..

وده أنا حابة استغله واحذر من جروبات الستات ..
المصريات بشكل كبير بيبروزوا شكل العنف اللي عايشينه وبيمارسوا أشكال اعنف بمختلفه على بعضهن، فا أنا بفضل تجنب مثل هذه التجمعات أو وضع شروط عدم تبادل الخبرات المجتمعية ..

2. الأذى العاطفي بيدمر احترام الذات ..
الضحية بتشوف نفسها جوة العلاقة المؤذية شئ بغيض وكريه وكويس أن الشخص المؤذي قابل بيها ..

وللأسف النوع ده الأذى صعب شرحه تماما، وفي الأغلب بيكون في نوع من قلب التربيزة، اللي هو أنا معملتكيش حاجة أنتي بيتهيألك، أنتي بتتهميني، وتلاقي نفسك بتعتذري عن شئ أنتي مش فهماه ..

3. دايرة الأذى بتتجدد
ودايرة الأذى مبيكونش كلها أذى .. في مرحلة فيها بيسموها حالة شهر العسل واللي بتتجدد بعد كل أذى واضح وقوي، أو عند رغبة الضحية في الخروج، بسرعة الشخص المؤذي بيحاول ينقذ الموقف ويقدم كل الحب والدلع والهدايا والكلام الحلو، والمسكنة والطبطبة عشان يقدر يحتفظ بضحيته جوة الدايرة ومتخرجش..

4. الخروج ثمنه غالي ..
معظم الضحايا بيخسروا أشياء كتيرة جدا جوة العلاقات المؤذية، شغلها وفلوسها وصحتها وعلاقاتها، وخروجها بيكون تمنه غالي جدا إما ماديا" مش هيكون معاها فلوس" أو مجتمعيا "هيكون اسمها مطلقة أو معاها طفل ومش هيكون مرغوب فيها" أو مهنيا "مستقبلها المهني ضاع" أو في علاقاتها "كلها اتدمرت تقريبا وهتبقى لوحدها بدون دعم"

وده في الأغلب مبيكونش حقيقي إلا أن ده بيكون من ضمن الحالة اللي بيخلقها الشخص المؤذي لضحيته عشان يخوفها من الخروج ..

5. المحاولات الفاشلة ..
الضحية بتحاول تخرج كتير ولكنها في الأغلب بتكون محاولات فاشلة، فا بيجي وقت وبتستسلم وبتفتكر أن كل المحاولات فاشلة..

6. لوم المجتمع ..
مش كنت استحملتي عشان عيالك .. لو اتطلقتي مش هتلاقي جوازة تاني .. فيها ايه لما كنت تديله فرصة كمان .. مش يمكن اتغير .. ومش ده كان اختيارك من الاول .. مش ياما قولنالك ..

7. الاستثمار في العلاقة ..
صعب الانسان يتخلى عن سنين عمره ويمشي، كتير مننا بيفضل جوة علاقة بسبب تضحياته أو سنين عمره اللي عدت .. وبيشوف أنه الأفضل بدل ما يمشي ويرمي كل ده أنه يفضل يحاول ..

8. احساس المسئولية تجاه اللي بيحصلها ..
الضحية بتكون شايفة نفسها سبب في الأذى اللي بتتعرضله بسبب لوم المجتمع والتربية وغيره، مش بس كده ده كمان ساعات بتشوف أنها كانت سبب في تعاسة الشريك اللي هو مؤذي أصلا وده بيخليها تفضل جوة العلاقة متحملة مسئولية الشخص المؤذي وبتتحمل نتيجة أفعالها اللي من وجهة نظرها أدت للأذى ..

في أسباب أكتر بكتير من كده .. حاولت أجمع أكثرهم انتشارا ..
لوم الضحية أنها ممشيتش هو أذى في حد ذاته

**********
أتمنى الموضوع يكون فادكم زي نا فادنى
حاجه كمان (مش أنا اللى كاتبه الكلام ده ومعرفش مين اللى كاتبه بس لقيت الموضوع مفيد فقلت افيدكم)
نظرا لإنى قادرة على التحدى وعلى المواجهة جيت أسلق بيضه انبارح البيضه اتحرقت وفرقعت❤
انجوي يا ولاد