طيب!
اللى هتكلم فيه ده قمة الأهمية،
التنمر .
مبدأيا التنمر ده آثاره أسوأ فى الأطفال

يعنى تخيلو معايا
الطفل ده أهله بيهيؤوه فترة قبل الحضانة أو ابتدائى عشان لما يخش متحصلوش صدمة أو أو...
يروح مدرسته
يقعد فترة ميعرفش يكوِّن صحاب ،كل لما يحاوِل يصدوه.
يكره نفسه ويحس إن الغلط فيه ،يبدأ يتقوقع على نفسه فى سن تكوين الصداقات .
يوصلو لمرحلة التنمر ،الطفل يفضل يتدمر يتدمر يتدمر ،ويفضل يخاف ويضايق من نفسه ،طول الوقت حاسس بإن الغلط فيه هوا .
فى أطفال نفسيتهم بتدمر بسبب الموضوع ده.
حتى لو كان الموضوع بسيط.
ده طفل
الطفل بيكون حسه مرهف ، بيحب يكون محبوب من الناس بيحب يحس بإنه طفل محبوب وجميل.
انتم بتدمروا الناس بأفعال ملهاش تبرير.

فى نوع تانى بقى ألعن.!
الأهل هما السبب.
يزعقوا للطفل ، يدمروا نفسيته ،يبهدلوه ،يكرههوه فى نفسه بلا قصد.

بعد التعليقات السخيفة اللى بتدمر نفسية الأطفال بدون عمد منكم يا سادة
(ساعات بتيجى من قرايب الأهل)

_إيه ده انتم مطولينله شعره زي البنات كده ليه

_الراجل مبيعيطش

_لأ يا بنتى ده ابن خالته أرحم

_ابنى ده زنان بشكل

_بطل غباء بقى

_عشان كده معندكش صحاب

بتدمروا ولادكم ليه؟
ليه بتعملولهم قالب وتحطوهم فيه؟
ما تسيبوهم يتخبطوا ويتعلموا
هيجيى يوم انتم مش هتكونوا موجودين وهما هيتوهوا بسببكم.

والتنمر ممكن يبقى له آثار جانبية على الطفل  لما ينضج، يعني ممكن يبقى عنده ميول عدوانية ناحية كل اللي حواليه سواء لفظيًا أو سلوكيًا، وهنلاقيه بيميل للرياضات اللي كلها عنف وضرب ورزع ، وعلاقته بأصحابه كلها خناق عشان بيبقى مفكر انه كده هيثبت نفسه، وللأسف بيبقى مفكر ان الجامد هو اللي يتريق على غيره سواء بقى يكرهه في شكله او طريقة كلامه أو لبسه أو أو أو

زي ما حصل معاه كده زمان!

وكمان التنمر مش بيأثر على الأطفال بس..

يعني مثلا الولاد والبنات في مرحلة المراهقة بيبقوا بادئين يكونوا خلفية عن الدنيا حواليهم، وازاي يتعاملوا مع الناس، ازاي يقضوا وقت مع نفسهم، يبدأوا يكتشفوا مواهبهم..

لو اتعرضوا للتنمر ممكن يدخلوا في حالة اكتئاب حاد نتيجة لصدمتهم إنهم هيبدأوا يشوفوا ان الحياة سودة وكل الناس وحشة ويبدأوا يكرهوا نفسهم..

وممكن بعض الأشخاص لو إيمانهم ضعيف يبقوا عرضة للانتحار.

وأنا مش بأڤور وهيا دي الحقيقة اللى انتم بتستخبوا منها

القصة دى شفتها من يومين بالظبط
منزلتش صورة الطفل مراعاةً للخصوصية

"ماباحبش أنزل صور ولادى على مواقع التواصل لكن نزلت دى لسبب  :
كان عندى عمر الله يرحمه ( ٤ سنين ) وقع من أسانصير قدام والدته ، هو توفى فورا ووالدته كان المشهد قاسي جدا عليها ( ربنا مايوريها لأي ام ) .. جالها ضغط من وقتها وجالها انهيار عصبي لازال  سايب أثر لحد دلوقتى
ارتضينا بقضاء ربنا واحتسبناه عند الله ، وربنا من فضله الواسع عوضنا و رزقنا ولدين توأم بعد سنة ونص من الحادثة  .. عمر وعمار
( عمار ) اتولد ب ٣ أصابع فقط في يده اليمنى وحمدنا ربنا ، وقلنا ربما ربنا بحكمته الواسعة دفع ضرر أكبر و الحمد لله إن جات على صبعين والولد شكله جميل
من كم شهر قبل الحظر لاحظت إن عمار بيرجع من الحضانة سرحان وبيفكر كتير ، وفجأة لاقيته بيسالنى : يابابا هو ربنا بيكرهنى ؟! طيب ليه قطع إيدى ( ده تعبيره ) ؟! ليه أنا مش زى بقية الاولاد ؟!
وقتها هو ماكانش زعلان .. كان محتار ليه هو مختلف عن بقية الأطفال اللي في سنه .. وعقله مش قادر يوصله لإجابات .. وعرفت ان ولد من الاولاد في الحضانة أما لاحظ إيده وهو بيحاول يكتب بها بصعوبة  قاله بقسوة : إن ربنا قطع إيديه لأنه بيكرهه
قلت له : ياحبيبي بالعكس ربنا بيحبك وخلقك شكلك جميل و كلنا بنحبك
وكلمت الميس في الحضانة تمنع أي حد يضايقه .. هو بيحب الحضانة وذكى ومحبوب الحمد لله ..  وخلال فترة الحظر وأجازة الحضانات نسي الموضوع خالص
بعد الغاء الحظر رجعناهم الحضانة ، بعد مارجع من الحضانة النهاردة لاقيته بيبكى ومنهار ، وبيقولى : أنا ماباحبش ربنا لأنه بيكرهنى وقطع لى إيدى ، ومش عاوز ادخل الجنة ومش هاأروح الحضانة تانى  .. عمار غير أخوه التوأم .. نفسه عزيزة جدا ونادر أما بيبكى ، علشان كده اما بيبكى باعرف أن حاجة كبيرة حصلت له
فهمت  أن واحد من الأولاد رجع عايره بإيده بشكل أكثر قسوة ، وفهمه إن ربنا عمل فيه فيه كده لأنه بيكرهه ومش هايدخله الجنة
صورته الصورة دي وانا باحاول إديله الموبايل علشان يلعب به علشان يهدى  فرفض ، و قلت له طيب هاأصورك ابتسم بقى ، لكنه استمر في البكاء بحرقة  .. مين عنده ذرة إنسانية يفطر قلب طفل ماكملش أربع سنين
الحضانة هاأغيرها وابنى هااحميه وهاابعده عن أي شيء  ممكن يسبب له إيذاء نفسي أو جسدى 
لكن اللى عاوز أقوله إن فيه أطفال مش أبرياء ولاحاجة ، فيه اطفال فيهم كمية عنف وشر رهيبة  .. طفل جارنا ضرب أخته بألة حادة  في رجليها و البنت خيطت عشر غرز .. شفت  أطفال ماسكين كلب صغير وبيعذبوه  .. شفت ولد ماسك عصفور وبيقطع رجله ، المشكلة إنهم بيعملوا كده وهم مستمتعين  بالجرايم دي وبدون أي  تأنيب ضمير  .. دول لما يكبروا هايبقوا إيه ؟!!
الطفل بيولد على الفطرة صحيح ، لكن بيتعلم العنف والكراهية والقسوة والتنمر في وجود أب وأم مهملين  ومجتمع مختل المعايير
ماتسيبوش ولادكم قدام التليفزيون يتفرجوا على  أفلام البلطجية والمنحرفين لانهم بيتعلموا منهم وبيقلدوهم .. ماتسيبوهمش في الشارع مع أصدقاء سوء  .. اسألوا عن أصدقاء ولادكم وأخلاقهم وأهلهم  .. علموا ولادكم الدين وعلموهم الإنسانية وعلموهم إن الكلمة ممكن تحيي إنسان وممكن تموته
القاتل مااتولدش قاتل ولا المتحرش اتولد متحرش ولا المتنمر اتولد متنمر 
اللي بيحصل في المجتمع إحنا سبب في جزء كبير منه
أولادنا أمانة وإحنا اللي بنشكل سلوكهم وأخلاقهم اللي بتستمر معاهم طول حياتهم

بأمانة القصة دى لمستنى من جوا أنا شخصيا
كل واحد فينا ممكن بكلمة يلمس حاجه مكسورة جوا حد فينا
_التريقة على شكل غيرك مش هزار

حابة أقول نقطه أخيرة كدا
التنمر ده مش للصغيرين بس
ده بيحصل لصغيرين وكبار وكل الأعمار
التنمر بمعنى السخرية
مش لازم يتريق على شكلك ..
التريقة على روحك
السخرية من وجودك

بطلوا مرض عشان انتم بتدمروا الشخص السليم
تو بي اونست كنت ناوية اقولكم كلام اتقالى انا شخصيا
بس هحاول منكدش عليكم يا جماعة❤

*****
البارت طويل زي ما كنتم بتطلبوا ❤
جماعة البارت ده شركه بينى وبين كاتبة قمر اوى كده
Jena_ElBrembally500. ❤
خشوا اقراوا كتاباتها عشان عظمة