ركزوا معايا كده يا جماعة ربنا يكرمكم.
إنت مين؟
يعنى عندك كام شخصية؟ فى منك كام صورة ...كام وش؟
كام مرة بتحط نفسك فى قالب حد تانى؟
يعنى تحط نفسك مكانه وتشوف مشاكله ويصعب عليك وتحلهاله؟
طب هسألكم السؤال بصيغة تانية..
كام مرة بتشكل شخصيتك على شكل وفكر الشخص اللى قدامك؟

طب بلاش انت خالص.
مين الشخص اللى انت تعرفه اللى كده؟ وبيتلون مع ده ومع ده ومع ده.
الشخص اللى بيتلون كتير ده مع الوقت مبيعرفش نفسه.
مبيعرفش هوا مين من كتر تقلبه جوا الشخصيات.
_______
مرض (اضطراب الشخصية المتعددة ) multiple personality disorder*
هنا المريض بيكون عنده اكتر من شخصية ، غالبا بيكونو شخصيتين متناقدين وعكس بعض تماما.
يعنى شخصية خجولة وشخصية جريئة...شخصية ضعيفة وشخصية قوية.
مش بس كده.
ده ممكن كل شخصية يكون ليها سن مختلف عن التانية.
يعنى فى الشخصية الاولى بيتكلم وبيتصرف كطفل عنده 6 سنين
وفى الشخصية التانية بيتكلم وبيتصرف كانسان عنده 30 سنة.
برضه مش بسكده ،ده بيحصل كتير انه يكون فى تغيرات بيولوجيه (جسدية)
بين الشخصيتين ،يعنى شخصية فيهم يكون مقاس نظرها سته على سته ،والشخصية التانية نظرها سته على سته وتلاتين ،احنا بنتكلم على اتنين بنى آدمين عايشين فى نفس الجسم.
شخصيتين ميعرفوش أي حاجه عن بعض كل شخصية منهم ليها حياة منفصلة.
___________
طب تعرف ان الصدمات النفسية ممكن تخلق داخل حد شخصيه (شخصيات) مختلفه؟
يغير ببنهم مع تقلبات مزاجه....من حين لآخر.
طب تعالوا نرجع ورا كده نشوف ازاي بنصنع الشخصية الحدية داخل "نظام العائلة الداخلية."
كل بنى آدم بيتولد بتكوين نفسى فطرى ،سبيكة خام نقية من أي شوائب.
التركيبة دى لما تبدأ تحتك بالعالم وتظهر على وش الدنيا ،هتتعرض لبعض الصعوبات...صدمات نفسية...لكن بنتعامل مع ده وبنتصدى ليه بطرق مختلفه.
بس احيانا الجرح بيكون عميق...والألم شديد ، لدرجه تفوق احتمالنا .
ساعتها بيضطر عقلنا انه يتدخل بطريقة مختلفه ،عشان يحفظ التركيبة دى من الإنهيار.
عقلنا بيقرر انه ينقذ الجزء المجروح ده ويحافظ عليه من اي خطر وصدمات تانية.
مافيش حد فينا مافيش جواه جزء مجروح ...
مفيش حد فينا ماتصدمش أو ماتخذلش أو ماتخانش...
مفيش حد فينا سليم وقوي ومعافى بنسبه 100%
طب امتى تحصل المشكلة؟
الخطأ الأول اللى بيرتكبه أي حد قصاد جزء مش عاجبه من نفسه إنه يرفض الجزء ده .
ويقرر يتخلص منه ،ويبدأ يخوض خناقات وصراعات تستهلكه وتستنزفه مع الجزء ده.

_اه ما احنا عارفين اننا مهم نتقبل الحزن والضعف والخوف..ومانرفضهمش ...لإنهم مشاعر موجودة عند كل البشر.

_لأ مش ده قصدي، أنا هنا مش بتكلم عن الأجزاء الطبيعية اللى جوانا اللى طبعا مهم نتقبلها ومنرفضهاش ،أنا باتكلم عن الأجزاء المريضة اللى جوانا.

_إيه ده؟!عاوزنى اقبل الجزء المكتئب فيا ؟عاوزنى أرضى بالجزء الجبان منى؟ عاوزنى أستسلم للجزء العصبى والموسوس منى؟
الحقيقة ...آه.
نقبل أي حاجه ،وكل حاجه لو بجد عايزين نتغير.
بس خلى بالك ..
نقبل مش معناها نوافق ..نقبل مش معناها نرضى...نقبل مش معناها نستسلم.
نقبل معناها نفهم ،نشوف ،نعرف ،
نقرب من الجزء المتمرد فينا ،نتكلم مع الجزء المعطوب بداخلنا.
_________
افتح حضنك لنفسك...حبها وسامحها وقدرها...شوفها وحسها وارحمها.
يمكن نكتشف عن نفسنا حاجه جديدة
يمكن نكمل اللى ناقص فينا
يمكن نكتشف ان المثالية الحقيقية بتبدأ من قبول الأجزاء اللى مش قابلينها فى نفسنا .

*************
* اقتباس من لأ بطعم الفلامنجو للكاتب د. محمد طه.
اتمنى البارت بكون عجبكم يا ولاد...
أي اقتراحات؟