مبدأيا كده أي حد هيقولى الست مكانها المطبخ هفشفش دماغه
انبارح جربت موضوع المطبخ ده للمرة الأولى والأخيرة بإذن الله
"متستغربوش يا جماعة انا كنت بعمل بيتزا وباتيه ومعجنات لكن عمرى ما طبخت"
دخلت المطبخ بجرأة وإقدام
المهم يا جماعة النتيجة اهم حاجة...
حرقت الرز.
ايوة والله
الرز بعد ما عجن فى بعضه اتحرق
فبالتالى مش كل الستات مكانها المطبخ
واللى أثبتلى الموضوع ده
نظرات عيلتى بعد ما بوظت الغدا...

نخش فى المفيد بقى...
المجتمع حاطط قالب معين للمرأة
بمعنى
عايزينك تكونى احسن حاجة بس هننتقدك بردوا

عايزة أبقى اعلامية
_وتطبلى لبتوع السياسة

عايزة ابقى مضيفة طيران
_وتبقى خدامة الطيارة

عايزة ابقى ممرضة
_والدكتور يستعلى عليكى ويقرفك؟

عايزة اخش فنون جميلة
_اخرك ترسمى وتلونى يعنى

عايزة اخش صيدلة
_آخرك تقعدى فى صيدلية وتبقى بياعة

صراحة يا جماعة المجتمع ده حاجة مريضة
ليه؟
عايزك تبقى حل حاجة بس هيقول رأيه وهيدمرك بردو

بنت يبقى عندها 23 الخطوبة اتفسخت
تلاقى الناس رايحين جايين
متشوفولها عريس
البت غلبانة
هتفضل قاعدة فى أرابيز اهلها كده؟

شوفوا بقى حاجة كمان
الست تشتغل ويبقى ليها كاريرها يقولوا عليها ست بيت خايبة
يوم ما تتجوز
يفضلوا يقولوا دى مش نافعة وجوزها وعيالها اولى بوقتها ده

الست تقعد فى البيت بشهادتها وتخلى وقتها لجوزها وعيالها
يقولول دى ولية خايبة مش كانت تعمل حاجة لمستقبلها

مجتمع ملئ بالإنتقادات
المشكلة هنا ان المجتمع خلى البنات يبصوا لبعض
المتجوزة وقاعده فى البيت بعيالها تبص لصاحبة الشهادة انها بايرة

يبقى يا جماعة تفوا تلت تفات على المجتمع وعيشوا حياتكم زي ما انتم عايزين

طبعا أغلبكم سمعتم قصة الواد المصرى اللى فى جامعة امريكية اللى اتحرش ب100 فتاة واغتصب اكتر من 10
المجتمع يدعم البنت ؟!
أبدا هيا السبب
هدومها السبب
شكلها السبب
مهى لو كانت لابسة كذا مكنش ده حصل
مهى لو كان صوتها واطى مكنش ده حصل

انتم بتسيبو الجانى وتمسكوا فى المجنى عليه ؟!
المشكلة مش فى كده
المشكلة انهم بيبرروا افعال الراجل

يعنى تخيلو معايا كده
الراجل عنده غرايز ورغبات
والحيوان بردو عنده غرايز
اللى بيفرق بينهم حاجة واحدة
الراجل المفروض انه بيتحكم فى غرايزه على عكس الحيوان
"طبعا مش هعمم القاعدة فى كل كلامى "

اذن مفيش مبرر انك تتحرش بواحدة ماشية فى الشارع عادى
اذن انت كده حيوان مش انسان اصلا
ويا جماعة
احنا بردو سمعنا ان فى رجالة اتحرشوا بمنقبات
اذن حتى المحتشمات بيتحرشوا بيهم...
يبقى تتنيلو تتكتموا
والشيوخ الجهلة ميتكلموش كتير

بالمناسبه ا الرجاله مش حيوانات بديل ماشية على الأرض وان الطبيعى انه يكبت غرايزه عادى جدا

طب ايه كمان

الغريب بقى ان فيه متحرشين بيتحرشوا بأطفال...
شوفتوا بقى..
وبعدين ثوانى كده
الست حرة تلبس اللى هيا عايزاه
ايوة يا جماعة فى شرع محدد كل حاجة
بس فى حاجة بقى
كل واحدة حرة بلبسها

من المواقف الغريبة اللى بتقابل الواحد
تلاقى شخص جاي يتقدم لبنت مش محجبة
المهم يشترط عليها تتحجب...
اللى هوا متروح تاخد واحدة

حاجة غريبة تانية بقى
تخيلوا معايا كده

واحدة ساكنة فى المنصورة عادى
متصورة صورة عادية جدا ونزلتها صورة بروفايل للفيس...انستا
تكتشفى ان صورتك نزلت على جروب فضايح..
اللى هوا صورتك المعلنة للناس كلها بقت فضيحة..
بصوا معرفش الفضيحة فين هنا بس تمام

خلونا متفقين ان الست 50% من المجتمع
وكونك شفتها ماشية فى الشارع او واقفة فى سوبر ماركت
ده مش معناه انك لقيت تحفه اثرية يجب تصويرها ووضعها فى محمية طبيعية
افهموا يا بهايم
يا بهايم
"بترول يا جماعة."


****
الواحد بيحاول ينتقد الحاجات اليومية المستفزة بس يلا
بكرة بارت جديد باذن الله♥