حبيت أكلمكم البارت ده عن الحب❤

من يوم ما سيادتك جيت الدنيا وإنت بتحب؛مفاجئة مش كده؟

هبسطهالكم خالص
الناس اللى شايفة ان الحب والمشاعر دى حرام، او مش ضرورى انك تفصح عنها
أحب أعرفهم ان ربنا اللى خلقنى وخلقك
حط فى الفص الصدغى من المخ (جزء فى المخ)،منطقة تسمى بالجهاز الحوفى
ايوة ده بتاع ايه يعنى؟
ده مسئول عن المشاعر والأحاسيس
تخيل معايا كده...
لو الجهاز ده مكنش موجود فى المخ
مكنش هيكون فى داعى ان الأم تحب ابنها وتخاف عليه
البنت تحب زوجها
الاب يحب ولاده
مكنش هيكون فى بشر أصلا...

إذن المشاعر مش حرام !

طب أنا مبحبش
لأ بتحب
ممكن مش واخد بالك بس الحب متجسد حواليك فى كل حاجه
أهلك
صحابك

يمكن أول حد ممكن نتعلم الحب منه فى يوم هوا الأهل

نكون واضحين وصريحين أكتر؟
الصحاب بيكونوا أقرب من الأهل لينا فى أوقات كتير.
إزاي يعنى؟!
فاكر يا واد يا أحمد البت اللى انت حبيتها وروحت قولت لصاحبك عليها ومقلتش لأمك أو أبوك؟
شوفتو بقى أهو ده سبب
بطبيعة الفطرة البشرية
الإنسان بيميل لحد فى نفس سنه ،بنفس تفكيره .
عشان كده الصداقة مهمة
لإنها بتعودك من صغرك على البوح بمشاعرك وأحاسيسك
بتعودك على الود والمودة.

نرجع تانى للحب.
إحنا بنحب أزاي
خلونا عارفين إن في فرق بين الحب والإعجاب.
يعنى على سبيل المثال

شوفت ممثل فى مسلسل ولا حاجه حبيت شخصية البطل وطريقته
بس مش الحب اللى هوا يا أنا يا مفيش(بصوت تامر حسنى.)
ده بيكون إعجاب
مش حب.

طب أفرق إزاي يعنى؟
غالبا الإعجاب بيكون نزوة عابرة
بمعنى إنك مش بتفكر فيه طول الوقت صبح وليل
بس عادى يعنى لما بتفتكره بتفكر فيه عادى.

طب الحب؟
نظرا لإنى كائن سنجول فأنا مش هتكلم عشان ميكونش جهل يعنى
بس هقول نصيحة صغنطوطة كده لكلا الطرفين:
لما تحبوا يا جماعة احترموا بعض
ادعموا بعض
خلوا فى ثقة متبادلة عشان العلاقة دي تتنيل على خير
روح احكيلها عن يومك يا أخويا وايه اللى بيحصل فى حياتك
وانت يا بنتى خلى فى جو مرح فى البيت النكد بتاع الهرمونات ده ملوش لزمه.
وانت يا أخويا الرجولة مش انك تضربها وتقعدها فى البيت انت مشتريتش نيش.
عاملها زي ما كانت عايشة فى بيت أبوها يا أخويا
حبها يا جدع حبها.

استنوا بقى لسه مخلصتش
فى موضوع الحب ده حابة أدخل الصداقة والإرتباط سوا:
عافروا يا جماعة
عافروا لحد ما تلاقوا الشخص المناسب اللى ينفع يكون صاحب وأخ وكل حاجه
عافرو لحد ما تلاقوا الشخص اللى يكتم أسراركم
يحبكم ويخاف عليكم
يوجهكم للصح مش للغلط
عافروا لحد ما تلاقوا الشخص اللى بيشجعكم وبيفرك التراب عشان يطلع مواهبك
الشحص اللى بيكون فخور بكل نجاح بتعمله
الشخص اللى أحلامك بالنسباله أحلامه برده
اللى فخور بيك منغير ما تعمل حاجه .
حبوا يا جماعة وعافروا عشان تلاقوا الشخص الصح
كونوا علاقة صداقة لطيفة تكون ذكرى حلوة
خليكم ذكرى حلوى فى حياة أي شخص بتعدوا عليه 💛

*****************
قرائى قرائى قرائى
سيبولى كومنت حلو
الفوت يا جدعان

ريڤيو مهم لازم أعمله

رواية ماجدولين❤ للكاتب (مصطفى لطفى المنفلوطى)
الرواية من روايات زمان
"الرواية ورقية يا جماعة"
بجد بجد بجد من أعظم الروايات الرومانسية اللى قرأتها فى حياتى
السرد ميزهقكش والقصة فى منتهى الواقعية
كمية الكلمات اللى فيها رهيبة
لو عليا أقرأهالكم غصب عنكم
مليانه جمال ودلال وعظمة بجد...
مش بالرواية الكبيرة أوى بس خرجتنى من الرايتر بلوك اللى كان عندى 250 صفحة غالبا.

موجودة بي دي أف لو حابين تقرأوها❤