كام مرة الناس المحيطه بيك اتحكمت فيك؟
_لا أنا شخص مستقل بذاتى وأنا اللى باخد القرار دايما.

طب خلينا نسأل السؤال بشكل مختلف.
لما بتلبس طقم معين عاجبك وحد يعلق عليه تعليق وحش بتلبسه تانى؟
لما انت كبنت بتلفى الطرحة بشكل معين او بتسرحى شعرك تسريحه محددة وحد يقول رأيه بقلة ذوق بتعمليها تانى؟
حتى لو اجابتك لأ ،فجواك كان فى ألف آه.

أحيانا فى بعض الشخصيات (الحالات) بنظهر عدم الإهتمام برأي اللى قدامنا ،لكن فى أول لحظه بنقعد فيها مع نفسنا بنبص للشيئ اللى تم انتقاده بشكل تانى.
_اه الطقم كان وحش عشان مش لايق على بشرتى وانا مش واخدة بالى.
_اه الطرحه بالشكل ده كانت فلاحى وبلدى اوى انا ازاي عملتها كده؟!
_اه شعرى كده مكنش لايق على وشى لا لايق على الطقم انا ازاي مخدتش بالى؟

تبدأ تنتقد نفسك قدام المراية لمجرد فكرة إن شخص عنده ذوق مختلف ورأي خاص بيه قالك حاجه مش فيك.
واليوم يبوظ وكل شوية تبص فى المراية هل فعلا كان شكلى وحش وترهق نفسك بالتفكير وتخش تنام وانت على أمل أنك كان شكلك يومها مقبول الى حد ما.

فى شحص تانى بيواجه عدم القبول ده بالعند ،اللى هوا طب انا هلبس نفس الطقم الحفلة الجاية ،الشخص يفضل ينهك نفسه فى التفكير فى رد لو الشخص ده ضايقه بكلامه تانى .

تعالو نرجع فلاش باك للأصل كده...
انت علاقتك بجسمك عاملة ازاي؟
طولت ما أنت شايف إنك تخين وكاره جسمك عمرك ما هتخس
_سد ودنك عن أي انتقاد بيجيلك على "جسمك"
سواء كانت رسالة من الأهل...من المجتمع ..من التربية.
هل انت بتسمع جسمك؟بتفهمه؟ بتحسه وبتحترمه؟
_جسمك مش ثور فى ساقية عشان تفضل تحمل عليه تحمل عليه ومنتظر منه الصمود والبقاء.

تعالو نتعمق فى المجتمع حبتين تلاته كده.
_متعيطش مفيش راجل بيعيط البنات بس اللى بتعيط.
يبدأ الولد ياخد فكرة غلط عن الرجولة
الرجولة قسوة وغلظة.
راجل يعنى مفيش حاجه اسمها مشاعر ومفيش حاجه اسمها رحمه.
شايفينى مكبرة الموضوع؟
لأ، لإن فعليا فى ناس للأسف بتتأقلم على فكرة ان الراجل يعنى جمود وبرود وللأسف بيظهرو للمجتمع فى شكل الكمال والعظمة ،فالناس تعظمهم وتحترمهم.
وهما أصلا غلط.
مش لازم تكون أنت كراجل معدوم المشاعر عشان تكون راجل "فى نظر مجتمع متدين بطبعه"
مش لازم تكون قاسى وايدك طويلة عشان يتقال عليك "بيعرف يشكم أهل بيته"
انت ممكن تكون راجل بطبيعتك الفطرية...بحنيتك برحمتك بمحبتك بكل حاجه.

بنت 6 سنين لابسة فستان قصير وفرحانة بيه وسعيدة
_ايه يا بنت اللى انت لابساه ده ؟بطلى قلة أدب ...أمال لما تكبرى هتعملى ايه؟

البنت تبدأ تاخد فكرة غلط عن نفسها ،أنا وحشه ...أنا عار...أنا عاقة لأهلى...الأنوثة عيب...الأنوثه حرام...(مع العلم انها عندها 6 سنين).

نفس البنت بعد كام سنه ،تكبر تقص شعرها قصه رجالى ،تلبس قميص كاروهات وهيا فى نظرها شايفة انها لو معملتش كده مش هتاخد حقها فى المجتمع
مجتمعنا العظيم جدا يبصلها ك "بنت مسترجله" مع انه هوا نفس المجتمع اللى طالبها وهيا طفلة انها تدفن انوثتها !.

طب ليه؟
مش لازم نسمع كلام المجتمع فى كل حاجه.
مش كل العادات والتقاليد اللى احنا اتربينا عليها صح ...
مش كل حاجه حلوة طول الوقت ومش كل حاجه غلط طول الوقت.
زي ما فى عادات فى مجتمعنا محتاجين نفضل متمسكين بيها فى عادات تانية محتاجين ندفنها عن الوجود.
ابسط مثال ممكن أديه فى نهاية البارت ده.
الختان.
بدأ أزاي؟
كان عادة موجودة فى عيلة ،امتدت لقرية ،امتدت لأكتر من مدينة.
الحاجات اللى احنا بنحاول نغيرها دلوقت كانت عادات وتقاليد فى يوم من الأيام.
ده مش معناه ان كل حاجه فى المجتمع غلط.
فى الصح وفيه الغلط ،زي ما احنا فخورين بالصح لازم نسلط الضوء على الغلط.

_اميتو الباطل بالكتمان.
القاعدة دى متنفعش مع العادات والتقاليد ،هتلاقى العادة الغلط بتتمدد وبتنتشر .

______
انتم وحشتونى اوى كده ليه ها ليه؟💕💕💕💕