Chapter (3) ဘေဘီလေး Hayden (zawgyi+Unicode)



ကျိုးယွင်ရှန့် က အခန်းထောင့်မှာ ငြိမ်ငြိမ်လေး ရပ်နေတာကြောင့် Mobile company မှ စပွန်ဆာပေးသူက ပထမသူ့ကို သတိမထားမိပေမယ့် သူ
လူအုပ်ကြားမှ ဖြတ်လျှောက်လာတာကို မြင်လိုက်တာနဲ့ တပြိုင်နက် စပွန်ဆာရဲ့ မျက်လုံးတွေက တောက်ပသွားခဲ့သည်။

သူတို့ ထုတ်ထားတဲ့ လက်ရှိဖုန်းအမျိုးအစားမှာ အရောင်ငါးရောင်ရှိပြီး အဲ့ဒီထဲကတစ်ခုက လုံးဝသန့်စင်တဲ့အဖြူရောင်ကိုယ်ထည်နဲ့ မဲနက်တောက်ပတဲ့ မျက်နှာပြင်နဲ့ ပြုလုပ်ထားတာကြောင့် ရှင်းသန့် စမတ်ကျပြီး အဆင့်တန်းမြင့်သည့် ပုံစံရှိပြီး ကျိုးယွင်ရှန့်ရဲ့ ဝတ်စားပုံနဲ့ ဒီဖုန်းက အရမ်းကို လိုက်ဖက်လို့နေသည်။

Jeffrey က ကျိုးယွင်ရှန့်ကို အနက်ရောင်ဖုန်း ပေးမယ်လုပ်ပေမယ့် လို့ စပွန်ဆာက  အဖြူရောင်ဖုန်းပေးစေလိုက်သည်။ Jeffrey က ပုခုံးတွန့်လိုက်ပေမယ့် ဘာမှမပြောပဲ ဖုန်းအဖြူရောင်ကိုပေးလိုက်ပြီး စိတ်ထဲမှ တီးတိုးပြောလိုက်သည်။

'ကောင်းပြီလေ ၊ နောက်မှ ဒီကောင်လေးအပေါ် စိတ်ပျက်မသွားကြနဲ့ ။ ဒီကောင်လေးက ကင်မရာရှေ့ရောက်တာနဲ့ တောင့်တောင့်ကြီးဖြစ်ပြီး ခပ်ကြောင်ကြောင်ပုံစံဖြစ်နေတတ်ပြီး သူရဲ့သန့်စင်လှပလွန်းတဲ့ ရုပ်ရည်လေးကတောင် ဘယ်လိုမှ မဖုံးကွယ်နိုင်ဘူး။'

Romeo ကို ကြိုးနဲ့ဆွဲပြီး ဟိုးအမြင့်က ဘောင်တွေပေါ်ကို ဖြည်းညင်းစွာတင်လိုက်သည်။  Jeffrey က တောက်လျှောက် သူ့ကို အားပေးနေသည်။

"မလှုပ်နဲ့နော် ၊ မလှုပ်လိုက်နဲ့ ... မင်းရဲ့ကိုယ်ကို ဟန်ချက်ညီအောင် ထိန်းထားလိုက်။ မင်း လုပ်နိုင်မှာပါ ဘေဘီ။ ငါ မင်းကို ယုံတယ်။ "
ဂျက်ဖရီက တောက်လျှောက် သူ့ကို စိတ်ငြိမ်အောင် ချော့ပေးနေတယ်

ကျိုးယွင်ရှန့် ခေါင်းငြိမ့်ပြလိုက်ပြီး အပေါ်ကို ဆွဲတင်နေတဲ့ ကြိုးက ရပ်သွားတဲ့ အချိန်မှာ သူ့လက်တွေ ခြေတွေကို လှုပ်ရှားဖို့ ပြင်လိုက်သည်။
သူက နံရံဟောင်းတွေ ၊ သံချေးတက်နေတဲ့ သတ္တုဘောင်တန်းတွေ ဝန်းရံထားတဲ့ လေဟာနယ်ထဲ ရောက်နေတာ မဟုတ်သလို သူ့ရဲ့ ရှည်လျားသွယ်လျတဲ့ ခြေတံကို ဆန့်ထုတ်လိုက်ပြီး ခမ်းနားစွာတန်ဆာထင်ထားတဲ့ အခန်းထဲက ဇိမ်ကျနူးညံ့တဲ့ ဆိုဖာအပေါ်မှာ ထိုင်နေသလိုထင်ရသည်။


သူရဲ့ပုံစံက ဖုန်းကို ပေါ့ပေါ့ပါးပါး ကိုင်ထားပြီး  သူလုပ်တဲ့ ပါတီပွဲအတွက် ဘယ်သူ့ကို ဖိတ်မလဲဆိုပြီး   ဆိုဖာပေါ် ထိုင်စဉ်းစားနေသည့် ပုံမျိုးပေါက်နေသည်။
"Oh my God  သူ ဒီလိုပိုစ့်မျိုး ဘယ်လိုလုပ်လိုက်တာပါလိမ့် ? သူက လေထဲမှာ ကိုယ်ဟန်ကို တကယ်ထိန်းထားနိုင်တာပဲ။ သူ့နောက်မှာ တကယ်ပဲ ခုံတစ်လုံး ရှိနေတာလား? ရှိခဲ့မယ်ဆိုရင်လည်း အဲ့ဒီခုံက သိပ်ကို ခန်းနားထည်ဝါတဲ့ ထိုင်ခုံပဲ ဖြစ်ရမယ် "

စပွန်ဆာက ဒီ ဆယ်ကျော်သက် ကောင်လေးရဲ့ ပြုလိုက်လိုက်တဲ့ ကိုယ်အနေထားကို ကြည့်ပြီး အရမ်းကို အံ့အားသင့်သွားခဲ့သည်။ သူတို့ မြင်နေရတာက တကယ်လား၊ စိတ်ကူးပုံရိပ်လားဆိုတာတောင် မခွဲနိုင်အောင်ကို ခံစားလိုက်ရသည်။

ကျိုးယွင်ရှန့် လက်နှစ်ဖက်လုံးဖြင့် ဖုန်းကို ဟိုရွှေ့ ဒီရွှေ့ကစားနေပြီးနောက် ဖုန်းကိုင်ထားသော လက်တစ်ဖက်ကို ဆန့်တန်းလိုက်ပြီး နောက်လက်တစ်ဖက်က နဖူးပေါ်တင်လိုက်သည်။ ပြီးမှ သူက မျက်ခုံးတစ်ဖက်ကို မြင့်လိုက်ပြီး အမူအရာတစ်ခုလုပ်လိုက်သည်။  ဒီအမူယာက - ငါ ဘာလို့ သူတို့ကို အရင်စဆက်ရမှာလဲ ? ငါ့ကို အရင်စဆက်တဲ့သူက ကံထူးမှာပဲ။ ဘယ်သူကံထူးမလဲဆိုတာ ငါ စောင့်ကြည့်ရုံပေါ့ ဆိုသည့် ပုံပေါ်နေသည်ကို ကြည့်နေသည့် လူတိုင်း နားလည်လိုက်သည်။


သူ လေထဲမှာ ရောက်နေပြီး ကင်မရာတွေနှင့် အချိန်ခံထားရတာတောင် သူ့ရဲ အမူအရာတွေက တောင့်တင်းနေခြင်းမရှိပဲ သဘာဝကျကျ ရှိနေသည်။  သူက ဖုန်းကို ဓာတ်ပုံထဲမှာ ပါ်လွင်နေမည့် အနေထားဖြင့် ကိုင်ထားပြီး သူရဲ့ လှုပ်ရှားနေသည့်  အပြုအမူ လေးများက အရမ်းကိုလိုက်ဖက်ကာ လိုချင်သည့်အတိုင်း ကွက်တိကျနေခဲ့တယ်။

"အရမ်းကောင်းတယ်။ သူ့ကို ကျွန်တော် အရမ်းသဘောကျတယ်။ သူ လုပ်သွားတာတွေက ကျွန်တော်လိုချင်တဲ့စိတ်ကူးအတိုင်း ကွက်တိပဲ။"

စပွန်ဆာက စိတ်ရောကိုယ်ပါ လှိုက်လှိုက်လှဲလှဲ ချီးမွမ်းနေတော့သည်။

ဓာတ်ပုံဆရာလည်းကျိုးယွင်ရှန့်  ကိုယ်ဟန်အနေထားပြောင်းလိုက်တိုင်း မရပ်မနားကို ရိုက်နေလို့ ကင်မရာမီးက မျက်စိကြိမ်းလောက်အောင် တဖြတ်ဖြတ်နဲ့ တောက်လျှောက်လင်းနေသည်။

လက်ကလေးလှုပ်လိုက်တဲ့ပုံ၊ မျက်နှာလေး လှည့်လိုက်တဲ့ပုံ၊ မျက်ခုံးလေး ပင့်လိုက်တဲ့ပုံ၊ မျက်လုံးလေးက ခပ်စိုက်စိုက်ကြည့်နေတဲ့ပုံ စသဖြင့် ဘယ်လို လှုပ်ရှားမှုလေးမဆို အားလုံး သေသပ်လှပပြီး အကောင်းဆုံး အနေထားဖြစ်နေတော့သည်။

ကျိုးယွင်ရှန့် လက်ခတွေကို နေရာပြောင်းပြီး ကိုယ်ဟန် အနေထားပြောင်းမလို့လုပ်ပေမယ့် Jeffrey က သူ့ကိုလှမ်းတားလိုက်သည်။

"အရမ်းကောင်းတယ် Romeo ၊  အခု အောက်ကို ဆင်းလို့ရပြီ "

"ဒါပေမယ့် ကျွန်တော် အပေါ်ရောက်တာ သုံးမိနစ်ပဲရှိသေးတယ် "
ကျိုးယွင်ရှန့်ရဲ့ ဖုန်းကိုင်ထားပြီး လှမ်းပေးလိုက်တဲ့ပုံလေးက သိပ်ကို အပြစ်ကင်းစင်ပြီး အနည်းငယ် မကျေမနပ်ဖြစ်နေပုံပေါ်သည်။ Jeffrey ဘာမှမပြောရသေးခင် စပွန်ဆာက လက်ပြပြီး လှမ်းပြောလိုက်သည်။

"ဆင်းလာတော့ ကလေးလေး ၊ ကိုယ်တို့ လိုချင်တဲ့ ပုံအားလုံးရလိုက်ပြီ။ မင်းက တကယ့်ကို အံ့သြစရာကောင်းအောင် တော်တယ်။ "

ဓာတ်ပုံဆရာကလည်း ရှက်ရှက်နှင့် နှာခေါင်းကို ပွတ်လိုက်ပြီး ပြောလိုကသ်ည်။

" အစ်ကို မင်းရဲ့ကိုယ်ဟန်အနေထားအားလုံးအတွက် ပုံ 30 လုံးကို ရိုက်လိုက်မိပြီ ချာတိတ်လေး။ ဒါကြောင့် ထပ်ရိုက်လို့မရတော့ဘူး။ မင်းက ကင်မရာနဲ့ ဖက်မွေးလာတဲ့ အတိုင်း တကယ့်ကို အပိုလိုမရှိ ကွက်တိကျလွန်းတယ်ကွာ။ မင်းအတွက် ပြသနာရှိမှာ မဟုတ်ပါဘူး။"

အမှန်တိုင်းပြောရရင် ဒီသုံးမိနစ်အတွင်းမှာ သူ ပုံတစ်ရာကျော်လောက်ကို ရိုက်မိလိုက်တာပြီးတော့ တစ်ပုံမှ ပစ်ရက်လောက်စရာမရှိအောင်ကို သူ စိတ်တိုင်းကျ ကျေနပ်နေမိတယ်။ ဒါပေမယ့် ဒီအကြောင်းကို ဖွင့်ပြောမိလျှင် တခြားပြိုင်ပွဲဝင်တွေ  မကျေမနပ်နှင့် ပြောဆိုလာနိုင်သဖြင့် ထုတ်မပြောဝံ့ပေ။

"လာ...လာ၊ ဆင်းခဲ့တော့။ သတိထားဦးနော် "

Jeffrey က စက်သမားကို ဖြေးဖြေး ပြန်ချခိုင်းပြီး Romeo မြေပြင်ပေါ်ပြန်ရောက်လာသည်နှင့် အားပေးစကားဆိုလိုက်သည်။

"မင်း တကယ်ကို သန်မာပြီး အကောင်းဆုံး လုပ်နိုင်ခဲ့တယ် ကောင်လေး "

ကျိုးယွင်ရှန့် ခေါင်းငြိမ့်ပြပြီး လှည့်ကြည့်လိုက်တော့ Emily၊ Hayden နှင့် ဆံပင်အနီရောင်နဲ့ အမျိုးသမီးက လွဲလို့ ကျန်ပြိုင်ပွဲဝင်အားလုံးက သူ့ကို မနာလိုစွာစိုက်ကြည့်နေတာကိုတွေ့ရသည်။

Emily  က  သူ့ကို ရှိတယ်လို့တောင် သဘောမထားပေမဲ့ Hayden က သူ့ကို ကြည့်ရမှာ ကြောက်နေသည်။ ဆံပင်အနီနဲ့ ပွင့်လင်းသည့် စိတ်သဘောထားရှိသည့် အမျိုးသမီးက Ivana Brewster ဆိုတာ ကျိုးယွင်ရှန့် မှတ်မိလိုက်သည်။ သူမ၏ အမည်က အရမ်းကို ခွန်အားရှိပြီး သူမက အရပ်  ၁၈၀ စင်တီမီတာရှည်ပြီး အမျိုးသမီးပြိုင်ပွဲဝင်များထဲတွင် အရပ် အရှည်ဆုံးဖြစ်တဲ့အပြင် ကျစ်လစ်လှပသော ခန္ဓာကိုယ် နှင့် ထူးခြားပြီး ဆွဲဆောင်မှုရှိသူဖြစ်သည်။

တခြားပြိုင်ပွဲဝင်များနှင့် မတူပဲ သူနှင့် Emily တို့က Romeo ရဲ့ အပြစ်ပြောခဲ့တဲ့ စကားတွေကို အရေးမစိုက်သူများဖြစစ်သည်။  Emily ရဲ့  စိတ်ထဲမှာ အဲ့လို ပြန်တုန့်ပြန်ဖို့ မတန်ဘူးလို့တွေးနေပေမယ့်  Ivana ကတော့ နဂိုဗီဇကိုက ကြင်နာတတ်ပြီး သည်းခံတတ်သည်။ သူက Romeo ကို လူ့လောကကြီးအကြောင်း မသိသေးတဲ့ ကလေးလိုပဲ သဘောထားတဲ့အတွက် သူ ပြောသမျှှကို ဗွေမယူခဲ့ပေ။ ဒီလိုမျိုး တွေးပေးနိုင်လောက်အောင် Ivana  ရဲ့စိတ်ထားက ပြည့်ဝခဲ့သည်။


သူမက ကျိုးယွင်ရှန့်ကို လက်မထောင်ပြတော့ ကျိုးယွင်ရှန့်က ပြုံးပြပြီး အခန်းထောင့်ကိုသွားပြီး ခပ်လျှိုလျှိုလေး ရပ်နေလိုက်သည်။ နောက်ပြိုင်ပွဲဝင်များက စပွန်ဆာ လိုချင်သည့်ပုံ ရအောင် မရိုက်ပေးနိုင်ကြပေ။ နောက်ဆုံး Hayden အလှည့်သာ ကျန်တော့သည်။

Haydenက ကြောက်ရွံ့မှုကို ချိုးနှိမ်အောင်ကြိုးစားပြီး မျက်နှာကို တင်းထားသောကြောင့် သူ့ပုံစံက တည်ကြည်ပြီး အားကိုးချင်စဖွယ် အမူယာပေါက်နေသည်။


Jeffrey က Hayden ကို စင်ပေါ် တွန်းပို့လိုက်ရင်း စပွန်ဆာကို ပြောလိုက်တယ်။

"သူက ကျွန်တော်တို့ရဲ့ အကြိုက်ဆုံး ပြိုင်ပွဲဝင်တစ်ယောက်လေ။ သူ့ရဲ့ performanceတွေကို ကျွန်တော်တို့  အမြဲကျေနပ်တဲ့ သူပေါ့ "

ချက်ချင်းပဲ Jeffrey က  သူပြောလိုက်တဲ့ စကားအတွက် ချက်ချင်းနောင်တရသွားခဲ့သည်။ Hayden သည်  လေထဲကို ရောက်သွားသည်နှင့် ကြောက်လန့်တကြား ရုန်းကန်အော်ဟစ်လိုက်ပြီး ပင့်ကူအိမ်တွင်မိကာ သေခါနီးပိုးကောင်လေးလို တဆတ်ဆတ်တုန်နေပြီး လက်ထဲမှ ဖုန်းကို အောက်ကို ပစ်ချလိုက်သည်အထိ အခြေနေ ဆိုးဝါးခဲ့သည်။


"Oh, no no၊ ကျွန်တော့်ကို ပြန်ချပေးပါ ။ ကျွန်တော် မရတော့ဘူး ။ ကျွန်တော် တကယ် မလုပ်နိုင်ဘူး "
သူက အဆက်မပြတ်အောင်ဟန်နေပြီး လက်တွေက တုန်ယင် နေသောကြောင့် ဟန်ချက်မညီတော့ပဲ ပြုတ်ကျကာ လေထဲ တွဲလောင်းဖြစ်နေတော့သည်။ သူ့ခြေထောက်တွေက ဟိုးစင်မြင့် ဘောင်ထက်က လွတ်သွားတာကို သိတော့ ကြောက်လန့်တကြား စူးခနဲအောင်ဟစ်လိုက်ပြီး ကြံ့ခိုင်တောင့်တင်းသည့် ကောင်လေးတစ်ယောက်က ကလေးငယ်လေး တစ်ယောက်လို စတင်ငိုကြွေးတော့သည်။

Jeffrey က Haydenရဲ့ အပြုအမူကြောင့် ကြောင်ကြည့်နေပြီး စပွန်ဆာလည်း ပါးစပ်ကို လက်နှင့်ပိတ်ကာ ပြောစရာစကားကင်းမဲ့သွားအောင်ပင်ဖြစ်နေသည်။

ကင်မရာသမားတွေက Haydenကို ဝိုင်းပတ်ပြီး သူရဲ့ ကို့ယို့ကားယားပုံစံကို အမိအရ မှတ်တမ်းတင်ကြတော့သည်။ သူတို့တာဝန်က စိတ်ဝင်စားစရာကောင်းသည့် အကွက်တိုင်းကို  မှတ်တမ်းတင်ရမှာဖြစ်ပြီး စိတ်ဝင်စားစရာကောင်းလေ ပိုကောင်းလေဖြစ်သည်။

"Hayden  မလှုပ်နဲ့ ။ မကြောက်နဲ့။ အသက်ကိုပြင်းပြင်းရှူ ၊ စိတ်ငြိမ်ငြိမ်ထား ၊ ဘာမှ ကြောက်စရာမလိုဘူး ဟုတ်ပြီလား။ အခု လုံခြုံရေးကိရိယာတွေက အဆင်သင့်ရှိတယ်။ မင်းမှာ ဘာအန္တရာယ်မှ မရှိတော့ဘူး။ Hayden မင်း ငါတို့ကို ယုံမှ ဖြစ်မယ် ။ ပြီးတော့ ဝန်ထမ်းတွေကို ယုံရမယ် "

Jeffrey က  Hayden ကို စိတ်သက်သာရာရအောင်ပြောပေး ပေမယ့်လည်း Hayden ယိမ်းထိုးနေပြီး အသက်ကယ်ကြိုးကို အဆက်မပြတ် ဝေ့ယမ်းနေသဖြင့် ဒီလိုလုပ်လေ သူ ဟန်ချက်ကို ပို ထိန်းမရလေဖြစ်ပြီး လေထဲမှာ ဝဲလှည့်နေသည်။


Haydenရဲ့ အော်သံက မကျယ်ပေမယ့် မိန်းမတစ်ယောက်ရဲ့ အော်သံလို ခပ်စူးစူးဖြစ်နေသဖြင့်  စပွန်ဆာဟာ သူ့ရဲ့ နားစည်ကြီးကိုတောင် ဆွဲထုတ်ပစ်ချင်နေသည့်အထိ ရှုံ့မဲ့နေသဖြင့် ဓာတ်ပုံဆရာလည်း အနားမှာ တိတ်ဆိတ်စွာ ရပ်နေလိုက်သည်။

Jeffreyလည်း Haydenကို စိတ်ငြိမ်အောင်လုပ်လို့မရသောအခါ စိတ်ပျက်စွာနှင့် လက်ကို ဝေ့ယမ်းလိုက်ပြီး ပြောလိုက်သည်။

"သူ့ကို ချပေးလိုက် ၊ သူ စိတ်ငြိမ်သွားတော့မှပဲ တစ်ခါ ထပ်ရိုက်ကြတာပေါ့"

စက်သမားလည်း စက်ကိုထိန်းကာ Haydenကို မြေပေါ် ဖြည်းဖြည်းချင်း ချပေးလိုက်သည်။ ပြိုင်ပွဲဝင်အားလုံးက Hayden ဆီ ပြေးသွားကြပြီး သူ့ကို နှစ်သိမ့်ပေးကြသည်။  အမ်မလီက သူ့ကို တင်းကြပ်စွာဖက်ပြီး နှစ်သိမ့်လိုက်သည်။

"အိုကေ...အိုကေ... အခု ရှင် အန္တရာယ်မရှိတော့ဘူး။ သူတို့ ရှင့်ကို ထပ်မတက်ခိုင်းတော့ပါဘူး "

Emily က Hayden အပေါ် ဘယ်လောက်ရှက်ပြီး စိတ်ပျက်သွားခဲ့လဲဆိုတာ ဘုရားသခင်သာ အသိဆုံးဖြစ်သည်။ သူမ စိတ်ဓါတ်ကြံခိုင်တဲ့ ယောက်ျား ကြိုက်ခဲ့ပါသော်လည်း ဒီလို နည်းနည်းမြင့်တဲ့နေရာ ရောက်ရုံနဲ့ မိန်းကလေးတစ်ယောက်လို စီခနဲ အော်ဟစ်တတ်တဲ့ မိန်းမလျာလို လူကို ချစ်သူတော်လိုက်ရသည်။ သူမ လှည့်စားခံလိုက်ရတယ်လို့  ခံစားရပေမယ့်  ဟေဒန့်မိသားစုရဲ့ နောက်ခံကြောင့် သည်းခံလိုက်သည်။

ဂျက်ဖရီက သူမ စကားကို ဝင်ပြောလိုက်သည်။

"မဟုတ်ဘူး။ သူ အပေါ်ကို ထပ်တက်ရလိမ့်မယ် အချစ်လေး။ သူ ဒီအဆင့်မှာ မရိုက်နိုင်ဘူးဆိုရင် နောက်တစ်ဆင့်ထပ်တက်နိုင်ဖို့ မသေချာတော့ဘူး "

ဒီစကားကြောင့် တည်ငြိမ်စပြုနေသည့် Hayden တစ်ယောက် တုန်လှုပ်ခြောက်ခြားသွားပြန်သည်။ သူ့မျက်နှာက ဖြူဖျော့ပြီး မျက်သားတွေတောင် နီရဲလာကာ တကိုယ်လုံး ထိန်းမရအောင် တုန်ယင်လာခဲ့သည်။ ပြိုင်ပွဲဝင်အားလုံးက သူ့ကို ချက်ချင်း ဝိုင်းနှစ်သိမ့်ပေးကြပေမယ့် သူတို့ရဲ့ စိတ်ထဲက ဘာတွေးနေသလဲ ဆိုတာ ဘယ်သူမှ မသိနိုင်ကြပေ။
ဒီအုပ်စုထဲ ဝင်မပါတာဆိုလို့ ကျိုးယွင်ရှန့်နှင့် Ivana တို့ နှစ်ယောက်တည်း သာ ရှိသည်။  ကျိုးယွင်ရှန့်က သူလှုပ်ရှားရမည့်အချိန်ကောင်းကို စောင့်နေပေမယ့် Ivana ကတော့ Haydenကို  လုံးလုံးမုန်းတီးသဘောမကျသောကြောင့်ဖြစ်သည်။

တခြားပြိုင်ပွဲဝင်တွေက Romeo ဘယ်လောက်အကျင့်မကောင်းပြီး ဆက်ဆံရခက်ခဲတယ်လို့ ပြောကြပေမယ့် သူမအမြင်မှာတော့ တကယ် အကျင့်မကောင်းဘဲ ဆက်ဆံရခက်ခဲသည့်သူက သူသည် Hayden ပဲဖြစသည်။ Hayden က ဟန်ဆောင်ဖုံးကွယ်ရာမှာ တော်ပြီး သူဌေးသားဆိုသည့် အရှိအဝါကြောင့် လူတွေက မမြင်ကြခြင်းဖြစ်သည်။


နှစ်သိမ့်ခံရလေလေ၊ Hayden၏ ကြောက်ရွံ့မှုက ပိုများလာလေဖြစ်ပြီး နောက်ဆုံးသူက  Jeffrey ကို လေပေါ်တက်ပြီး ဓါတ်ပုံ မရိုက်နိုင်တော့ကြောင့် ထပ်တလဲလဲပြောကာ မြေပြင်ပေါ်မှာပဲ ရိုက်ဖို့ အကြံပြုတော့သည်။ ဒါက တခြား ပြိုင်ပွဲဝင်တွေအတွက် လုံးဝမတရားသလိုဖြစ်လို့ Jeffrey  ငြင်းဆိုလိုက်သည်။ ဒါကြောင့် အခြေအနေတွေက မတိုးသာ မဆုတ်သာ အနေထားမှာ တစ်နေတော့သည်။

အဲ့ဒီအချိန်မှာ Romeo သည် လက်ခုပ်တီး လှောင်ရယ်ကာ ရှေ့တိုးလာပြီး လှောင်ပြောင်တော့သည်။

"ဘယ်သူက နို့စို့ကလေးလေးလို ငိုယိုနေတာလဲဆိုတာ ကြည့်ကြပါဦး။ ငါတို့ရဲ့ ကြံ့ခိုင်လှပါတယ်ဆိုတဲ့  Hayden ဖြစ်နေတာကိုး။ ဟား...ဟား ...  တကယ့်ကို ယောကျ်ားပီသပါတယ်ဆိုတဲ့ Haydenက ကလေး သေးခံလေး ဝတ်ပြီး ချိုလိမ်စုပ်နေရတဲ့ နို့စို့ကလေးလေးဖြစ်နေတာကိုး။  "

Emily  က Romeo ရဲ့ လှောင်ပြောင်စကားတွေကို ဒေါသတကြီး ပြန်မတုံ့ပြန်နိုင်သေးခင် Romeo က ဆက်ပြောလိုက်သည်။

"Hayden က သူ့မာမီရင်ခွင်ထဲမှာ သေးခံလဲပေးဖို့ ငိုယိုနေတဲ့ ကလေးပေါက်စလေးလိုပါပဲလား။ ဒါက သူ့အကျင့်ပဲလေ မထူးဆန်းပါဘူး။ "

" Romeo...နင်....! "

Emily  က ဒေါသတကြီးနှင့် လှမ်းဟောက်သည်။

"Romeo....မင်း အရမ်းလွန်နေပြီ ! မင်းမှာ ကိုယ်ချင်းစာစိတ်မရှိဘူးလား "

တခြားလူများကပါ ဝင်ရောက် ရှုံ့ချတော့သည်။

Hayden က  သူ ကြောက်လန့်နေခဲ့သည် မေ့လျော့သွားကာ လက်သီးဆုပ်ဖြင့် ကောင်လေးကို ထိုးရန် တဟုန်ထိုးပြေးထွက်လာပေမယ့် Jeffrey က ထိန်းထားပြီး ပြောလိုက်သည်။


" Hayden စိတ်အေးအေးထားစမ်း! ဒီအစီအစဉ်မှာ ကိုယ်ထိလက်ရောက်ရန်ဖြစ်ထိုးကြိတ်တာတွေ တားမြစ်ထားတယ်ဆိုတာ သိတယ်မလား ? ရန်ဖြစ်တဲ့သူက ပြိုင်ပွဲကနေ ထုတ်ခံရမှာ။ ဒါကြောင့် စိတ်လျော့လိုက်"


သို့သော် ကျိုးယွင်ရှန့်က သူ့ဒေါသကို ဆက်ဆွပေးနေသောကြောင့် Hayden က အတင်းရုန်းကန်ကာ ဒေါသကြီးနေခဲ့သည်။

"Hayden ဘေဘီလေး... မင်းက မင်းအမေရင်ခွင်ထဲ ငိုယိုလိုက်၊ သူများကို
ဒုက္ခပေးတာအပြင် ဘာလုပ်တတ်သေးလို့လဲ။ မင်းမှာ အစွမ်းအစ ရှိတယ်ဆိုရင် အခုချက်ချင်း အပေါ်ကိုတက်ပြီး ပြလိုက်လေ။ ဘာ.... မင်းက ယောကျားမဟုတ်ဘူး ဟုတ်လား။ ဒါဆို အထုပ်ပိုးပြင်ပြီး မင်း မေမေ့အိမ်ကို အမြန်ဆုံး လစ်လိုက်တော့။ မဟုတ်လို့ လေထဲ ကြောက်သေးပေါက်ချလို့ ငါတို့ နံစော်ကုန်လိမ့််မယ်။ မင်းသာ အိမ်ပြန်သွားမယ်ဆိုရင် ငါအရမ်းပျော်မိမှာပဲ "

ဒီလို ရန်စ စကားကို ပြောပြီးသည်နှင့် ကျိုးယွင်ရှန့်လက်ကိုမြှောက်၊ တင်ကိုလှုပ်ကာ မခံချင်အောင် ကပြနေလိုက်သည်။

ဒီနေ့လုပ်ရပ်ကို ပြသလိုက်ပြီဆိုတာနဲ့ Romeoရဲ့ သတင်းတွေက ရစရာမရှိအောင် စုတ်ပြတ်သွားမှာသေချာသည်။ သူ့မှာ ပြိုင်ဖက်အပေါ် ကြင်နာစိတ်လုံးဝမရှိဘူးဆိုပြီး ပရိတ်သတ်ရဲ့ အမုန်းကို ခံရမှာ အသေချာပင်။
ကင်မရာသမားကတော့ အစီအစဉ်အတွက် စိတ်ဝင်စားစရာ ဇာတ်လမ်းတွေ ရဖို့ကလွဲရင် Romeo ဘာဖြစ်ဖြစ် ဂရုစိုက်မှာ မဟုတ်ပေ။ ဒီအစီစဉ်ကို အားပေးတဲ့ ပရိတ်သတ်တွေ တိုးလာဖို့၊ ကြည့်ရှုနှုန်းများလာဖို့အတွက်ပဲ သူတို့က ဖြစ်တဲ့ပြသနာကို အကောင်းဆုံးဖုံးကွယ်ထားမှာဖြစ်သည်။

Hayden  ရုတ်တရက် ငြိမ်သွားပြီး  Jeffrey ကို ပြောလိုက်သည်။

"ကျွန်တော့်ကို အပေါ်ပြန်တင်ပေးပါ ။ ကျွန်တော် ဒါကို ဆက်ရိုက်မယ် "

"ဒါ အကောင်းဆုံးပဲ အချစ်လေး။ မင်းအတွက် ကိုယ်တကယ် ဂုဏ်ယူတယ်။ "

Jeffrey က  သူ့ကို ဝမ်းသာစွာ ဖက်ပြီး အပေါ်ပြန်တက်စေခဲ့သည်။

ဒေါသတွေ ၊ အမုန်းတွေကြောင့်Hayden ရဲ့ လုပ်ဆောင်ချက်များက အတော်ကောင်းခဲ့သည်။ သူရဲ့မျက်နှာက နည်းနည်းဖြူလျော်နေပေမဲ့ သူက ဟန်ချက်ထိန်းပြီး ရိုက်ရမည့်နေရာသို့ ဝင်သွားနိုင်ခဲ့သည်။
ဓာတ်ပုံဆရာသည်လည်း ဆွဲဆောင်မှုရှိသော ပုံတို့ကို ရိုက်ခဲ့ပြီးHayden ၏  စိတ်အားထက်သန်မှုကို အတော်ပင် ချီးကျူးသည့်ဟန် ပေါ်နေသည်။

ထို့အပြင် စပွန်ဆာ ကိုယ်တိုင်လည်း စိတ်ကျေနပ်သည့် အမူအရာများရှိနေသည်။

အားလုံးလည်း Hayden ကို မော့ကြည့်နေကြပြီး သူရဲ့ လှုပ်ရှားမှုတွေတိုင်းအတွက် အားပေးနေကြသည်။ သူတို့အကုန်လုံးက Romeo ကို မေ့ပျောက်သွားကြပေမဲ့လို့ ကင်မရာသမားကတော့ မမေ့ကြပေ။ ။ သူတို့က Romeo ရဲ့ အံ့အားသင့်မှုတွေ ၊ စိတ်ပျက်မှုတွေနဲ့ မနာလိုမှုတွေကို အမိအရ ရိုက်ချင်ကြသည်။

ဒါပေမယ့်  သူတို့် လူအုပ်ကြီးကို ကျော်ပြီး Romeo ဆီကို ကင်မရာလှမ်းချိန်လိုက်ချိန်မှာတော့ Romeo ရဲ့မျက်လုံးများထဲမှာ ပျော်ရွှင်ကြည်နူးမှုတွေ ၊ စိတ်အားထက်သန်မှုတွေအပြည့်နေသည့် အပြုံးကို တွေ့လိုက်ရသည်။

သူ့ဆီ ကင်မရာချိန်ထားတာတွေ့လိုက်ရသည့်အချိန်တွင် Romeo တောင့်ခနဲဖြစ်သွားပြီး  နူတ်မှ မသဲမကွဲ အသံပြုကာ လှည့်ထွက်သွားတော့သည်။

'သူ ဘာဖြစ်သွားတာလဲ ? ဒါဆို ဘာလို့များ ဒီလိုတွေ ဆိုးဆိုးဝါးဝါး ပြောခဲ့တာပါလိမ့် ? '

ကင်မရာသမားများက တစ်ယောက်ကို တစ်ယောက် နားမလည်သလို ကြည့်လိုက်မိကြသည်။


Ivana က  သူမ မေးစေ့ကိုပွတ်ကာ စဉ်းစားနေသည်။ Romeo ပြောဆိုပုံတွေက ပုံက Hayden ကို မုန်းနေတဲ့ ပုံလည်း မတူဘူး ဆိုတော့ ဒီကောင်လေးရင်ထဲမှာ သိုဝှက်ထားတာ အများကြီး ရှိသည်ကိုဆိုတာကို ရိပ်မိသွားသည်။